Juffrou Marelize Swanepoel
Hoe eet jy die Afrikaanse olifant?
Welkom by die realisering van 'n droom!
Laaste keer opgedateer op 18 Junie 2019
Afrikaans EAT is my passie. Hierdie webwerf dien as die platform om my passie met ander te deel. Hoewel skoolkinders beslis sal baatvind met die inhoud, is my mede-HT&EAT-kollegas my eintlike gehoor.
Juffrou Marelize Swanepoel is 'n gratis aanlynbron waar onderwysers en leerders toegang het tot verskeie hulpbronne. My grootste doel is om soveel moontlik onderwysers en leerders te bereik en te help. Ek besef dat ek maklik geld kan maak uit hierdie webwerf, maar dis die laaste ding wat ek wil doen.
Daar is 'n ongelooflike tekort aan hulpbronne vir EAT-onderwysers. Dit wat wel beskikbaar is, kom teen ’n minimale koste. Die probleem is dat slegs ’n handjievol oor die fondse beskik om toegang tot hierdie hulpbronne te kry. Daarom is my hulp beskikbaar aan enige persoon wat my webwerf besoek. Voor die bestaan van hierdie webwerf het ek hulpbronne gedeel via ’n wiziq-blad.
Dis moeilik om die gevoel te beskryf wanneer my Engelse kinders aankondig dat Afrikaans hul gunsteling vak is. Ek dink ek is een van min onderwysers wat opgewonde raak rondom eksamens. Ek kan nie wag dat my kinders moet skryf sodat ek dit kan nasien nie. Ek raak lief vir hierdie kinders en deur my entoesiasme en kreatiwiteit raak my kinders lief vir Afrikaans.
Ek het ook nou betrokke geraak by onderwyseropleiding waar ek my benaderings en insigte met my mede-kollegas deel. My benadering fokus op metodiek. Ek voel dat leerders met inhoud gebombardeer word wat gememoriseer moet word terwyl hulle eintlik met metodes bemagtig moet word om enige inhoud te kan hanteer. My doel is om vir ander te leer hoe die Afrikaanse olifant eintlik geëet moet word. Elke kortpad of metode dien as ’n spreekwoordelike happie wat die olifant eetbaar maak.
Afrikaans, as vak, is aansienlik makliker as wat tans die gevoel in ons skole is. Afrikaans en Wiskunde het eintlik baie ingemeen. Beide werk met formules. Hierdie formules dien as die sleutel om Afrikaans in die klaskamer te ontsluit. Hierdie formules is wat my metodiek uniek maak.
Ek glo dat ek gebore is om drie rolle te vervul:
1. Ek is gebore om my man se vrou te wees.
2. Ek is gebore om my dogtertjie se ma te wees.
3. Ek is gebore om ’n Afrikaans juffrou te wees.
"Taalklaskamers is geneig om te veel op inhoud te fokus en te min op metodes om enige inhoud te kan hanteer. Swanies is propvol metodes om jou te help."
Juffrou Marelize
Afrikaanse Taalraad - Kokertoekennings 2017 te Zevenwacht, Kuilsrivier.
Graag wil ek dankie sê vir elkeen se ondersteuning hierdie jaar. Julle sal nie glo hoe lekker dit vir my is om te weet en te hoor hoe baie hierdie webwerf julle help nie. Daar is ondersteuners se ver as Namibië.
Dit was 'n groot verrassing toe Ria Olivier, van die Afrikaanse Taalraad, my gekontak het met goeie nuus. Ek het 'n nominasie ontvang om 'n erepenning (Kokertoekenning) by die Afrikaanse Taalraad te ontvang vir die werk wat ek in en vir Afrikaans doen. Ek het 17 November 2017 die voorreg gehad om Kuilsrivier toe te vlieg om die Afrikaanse Taalraad Kokerfunksie by te woon.
Dit maak nie saak wie my genomineer het nie, uit die diepte van my hart - Baie dankie!
Groete
Juffrou Marelize
2019 is tot dusver 'n baie goeie jaar
Afrikaans opleiding vir Curro-onderwysers in Kwazulu-Natal, Wes-Kaap en Gauteng.
